طب النهاردة موضوعنا بيتكلم عن 3 حاجات ??
1 – ازاى العربية بتفرمل
2 – هنقول اية هو السيرفو
3 – سبب الصفارة اللى بتسمعها لما بتيجى تدوس فرامل
_______________
1 – ازاى العربية بتقف ؟ او بتفرمل ؟
أنت ماشى دلوقتى اهو .. روحت جاى دايس فرامل اية اللى بيحصل عشان العربية تقف ؟
لما بتدوس على دواسة الفرامل السيرفو بتاع الفرامل يضخ زيت للخراطيم اللى واصلة فى التيل يقوم التيل قافش على الطنبورة اللى هى الحتة المدورة دى …
لان العجلة بتلف على الطنبورة و بالتالى لما تمسك الطنبورة سرعة العربية سرعتها هتبدأ تقل ..
مش فاهم … ابسطهالك ..
هات جنية معدن و اعتبرة الطنبورة و وقفة على حاجة مستقيمة ?
و ابدأ حرك فى الجنية دة براحة و خلية يمشى مع نفسة و بعد كدة بصوابعك ( الابهام و السبابة )
امسك الجنية دة مرة واحدة من النحيتين هتلاقية وقف طب لية ؟ لانك أثرت على الجنية ( الطنبورة ) بقوة ايدك و المقصود ب ايدك هنا ( تيل الفرامل )
مثال ابسط … اركب الاسانسير بتاع عمارتكم هتلاقى زرار مكتوب علية Stop لونة احمر …
دوس علية دوسة و سيبة هتلاقى الاسانسير راح جاى واقف و مكمل تانى .. لية ؟ لان فى فرامل فى المكنة بتاعتة فوق وقفت التروس و رجعت شغلتها تانى ..
مثال ابسط بص لصورة الموضوع ..
الطنبورة و التيل و ايد الراجل شايفة ماسك التيل ازاى بكلوة ايدة كلها اهو كل لما يضغط ب ايدة على التيل يروح التيل جاى قافش فى الطنبورة و يفرمل العربية
________________
2 – طب يعنى اية سيرفو ؟
جرب كدة بعد ما تخلص مشاويرك كدة و شغلك و تركن عربيتك و تبطلها .. جرب بعدها بديقتين كدة تدوس على بدال الفرامل .. هتلاقي بقى ناشف كدة و مهما تدوس علية مش هينزل عن مستوى معين ?
طب لية ؟
هو دة ال Servo الجهاز دة لو مكنش اخترع كنت ديما هتلاقى الفرامل محجرة و ناشفة معاك و عاوزة عضلة سمانة حلوة و قوية عشان تعرف تدوس عليها ? ..
فكرة عملة ان الجهاز دة متوصل بخرطوم هوا من الموتور عشان لما تيجى تدوس فرامل تلاقى البدال ناعم و سايب ذى الوضع الطبيعى العادى و السيرفو لما بتبطل العربية بيقف لانة بيعتمد على انة ياخد جزء من زيت الماستر الرئيسى و برضة ساعتها خرطوم الهوا بيقف عن العمل و بكدة الفرامل تحجر ..
_________________
السؤال التالت … أسباب الصفارة اللى بسمعها مع دوسة الفرملة ؟
1 – لو التيل اللى انت مغيرة جايبة مش اصلى طبيعى جدا انك تسمع صوت صفارة لان و هو بيقفش على الطنبورة مش بيستحمل كل السخونية اللى طالعة منها يقوم جاى مصفر
2 – ان التيل يكون لسة جديد و بيطبع على الطنبورة و عشان يطبع بسرعة امشى اى مشوار 100 كيلو بالعربية و استخدم فرامل كتير
3 – ان التيل يكون علية رايش و وساخة و وعاوز يتنضف
4 – ان الطنبورة يكون فيها حاجة اسمها عالى و واطى يعنى مش متساوية كلها
يعنى مش كلها حتة واحدة … و دة ناتج لسببين
● انك مشيت فترة كبيرة بالطانبير و عدد كيلوات كتير جدا منغير ما تغير الطنابير ف مع الاستهلاك بيحصل عالى و واطى فيها
● انك بتغسلها و هى سخنة و دة بيخليها تعمل حاجة اسمها ” فقفقة ” و تعمل عالى و واطى و مع الوقت بتبوظ … و بتسمع الصفارة لان و التيل بيقفش على الطنبورة يلاقى حتة عالية يقوم واكلها فايقوم مصفر
و هوب يلاقى حتة واطية يقوم نازل فيها و يصفر و هكذا
