تعالو نفهم لية استهلاك البنزين بيزيد ؟
قولنا نصايح كتير فى الموضوع دة قبل كدة
استهلاك البنزين يعتبر اكبر مؤشر على صحة العربية
لان اى حاجة فى العربية ( عطل ) مباشر او غير مباشر هيأثر على استهلاك البنزين
و فعليا ممكن يكون سبب زيادة استهلاك البنزين
مش سبب واحد .. و تقدر تقول كمان انة مالوش مكان محدد فى العربية …
ب اختصار .. العملية كلها عبارة عن العلاقة بين الطاقة الخارجة من الموتور و استهلاكها من العربية فى المقابل .. و استهلاك البنزين عموما بيزيد لما بنلاقى استجابة العربية مش زى ماحنا عايزين
او متعودين و بالتالى نضطر ندوس بنزين اكتر عشان ناخد الاداء اللى احنا عاوزينة
● أولا .. الاسباب المتعلقة ب انتاج الطاقة ..
1 – دورة الوقود
لازم نتأكد ان البنزين بيوصل بكفائة للموتور
و مفيش حاجة معطلاة عشان كدة لازم نتاكد من
○ البنزين المستخدم الاوكتان بتاعة مناسب للموتور
( مش اقل من الاوكتان المطلوب فى الكتالوج )
○ فلتر البنزين نضيف مش مسدود
○ طلمبة البنزين شغالة كويس
○ خطوط و خراطيم البنزين سليمة و مفهاش تسرب او تشقق
2 – دايرة التشغيل …
○ الموبينة سليمة و بتطلع كهربا بكمية كافية
○ توقيت توزيع الشرارة سليم و مناسب مع سرعة الموتور
○ اسلاك البوجيهات سليمة و مش بتسرب كهربا
○ البوجيهات ذات نفسها بتوصل كهربا كويس و مش مرطبة
3 – كفائة الحريق ..
لازم نتاكد ان احتراق البنزين بيتم بشكل كامل عشان يدينا اكبر كمية ممكنة من الطاقة
و لو عاوز تظبط الحريق … لازم نتأكد من
○ نضافة فلتر الهوا
○ نضافة مجارى الهوا
○ برودة الهوا بالشكل الكافى و دة لازم تتاكد من الريداتير و المراوح و كل وسائل التبريد
4 – حالة الموتور الميكانيكية
○ التاكيهات مظبوطة
○ العادم بيخرج بسهولة و الشكمان مش مكتوم
○ الشنابر سليمة و حاكمة كويس و مفيش تسريب للضغط
○ ثرموستات الكوعة شغال و سليم و درجة الحرارة الموتور ديما فى قبل علامة النص بشرطة او عند النص بظبط
_____________
طيب .. كل اللي فات ده كنا بنتكلم على
الموتور علشان نضمن إنه بيطلع الطاقة اللي احنا عايزينها..
إنما فيه أسباب تانية كتير بتستهلك الطاقة دي وتخلي استهلاك البنزين يزيد بدون داعي.
ثانيا: أسباب متعلقة باستهلاك الطاقة
الأسباب دي متعددة وكتير فعلا.. إنما مبدأها واحد.. هو المقاومة اللي بتواجهها طاقة الموتور علشان تحرك العربية..
وكل ما كانت المقاومة أقل.. كل ما استهلاك البنزين هو كمان بقى أقل..
1- مقاومة داخل الموتور
وأبرز سبب هنا هو استخدام زيت بلزوجة أعلى من المسموح أو الموصى بيه في الكتالوج.. ويفضل تستخدم أقل لزوجة ممكنة في الكتالوج حسب المناسب للجو اللي العربية هتمشي فيه.
2- المقاومة بسبب الأحمال على الموتور
وده المقصود بيه أي حمل مباشر على الموتور .. زي:
* أي وزن زيادة على العربية.. فكل ما كانت العربية أخف كل ما كان استهلاك البنزين أقل.
* أي أجزاء بتشتغل عن طريق طاقة الموتور بتعمل حمل زايد على الموتور… زي كمبريسور المكيف والدينامو وطلمبة الباور.
3- المقاومة بسبب الأجزاء الميكانيكية
أي تآكل أو خلل في الأجزاء الميكانيكية في العفشة والفتيس بتشكل إعاقة لحركة العربية وتزود استهلاك البنزين.. علشان كده لازم تتأكد من إن:
* الكاوتش مضبوط على الضغط الصحيح (على البارد) حسب المكتوب على قايم العربية.
* زوايا العجل مظبوطة.
* اسطوانة الدبرياج (في الفتيس المانيوال) سليمة ومش بتفوّت.
* زيت الفتيس الأوتوماتك مضبوط ومش ناقص أو عايز يتغير.
4- إعاقة للحركة على الطريق
وهنا المقصود أي شيء خارج العربية وممكن يكون له علاقة بأسلوب السواقة.. علشان كده لازم ناخد بالنا من التالي:
* الطرق غير الممهدة بتعمل إعاقة لحركة العربية.
* فتح الشبابيك أثناء السفر بيزود مقاومة الهوا ويعوق حركة العربية.
* وضع أجزاء بارزة على جسم السيارة بيزود مقاومة الهوا (شبكة فوق السقف – مصدات نيكل على الاكصدام.. إلخ)
* كل الطرق المتجهة لأعلى بتعمل حمل زيادة على الموتور.
* تعشيق النسب المنخفضة في الفتيس بيستهلك بنزين كتير بدون حركة سريعة.. يعني المشي الكتير على الأول والتاني… وده يشمل
– المشي في الزحمة.
– الشد والحرق على الموتور.
