وش سلندر

الـفرق بين ” الـتيربو تشارجر ” و ” السـوبر تشارجر “

أية الفرق بين
” السوبر تشارجر ” و ” التيربو تشارجر ”
من أكتر المواضيع اللى أتطلبت منى بشكل متكرر ف انا قولت اجبلكم الزتونة بتاعتها

قبل ما نبدأ الموضوع
نسأل نفسنا سؤال … !!!
الموتور عاوز اية لزيادة قوتة ؟
المحرك مهما راح و جية دة عبارة عن آلة بتدخل مزيج من الهوا و البنزين عشان يتحرقو تقوم القوة تطلع فى الموتور و العربية تمشى ..
و ذى ماحنا عارفين .. ” النار بتحب الهوا عشان تزيد “
هنا بيجى دور ” السوبر تشارجر ” او “تيربو تشارجر”
” السوبر تشارجر ”
السوبر تشارجر عامل ذى الرئة فى جسم الانسان
احنا منغير الرئة هنموت و مش هنعرف نتنفس
طب اية هى الرئة بتاعت السوبر تشارج ؟
الرئة بتاعتة هو الموتور نفسة بتاع العربية
السوبر تشارج مورد للهوا المضغوط اللى داخل للموتور بدل ما يروح منغير لازمة
السوبر تشارج بياخدة يحتفظ بية لنفسة و يقوم مدخلة على الموتور يقوم الحرق يحصل بشكل اعلى ..
مش فاهم ?
ابسطهالك … هنتخيل ان فى مصدرين هوا للموتور
المصدر الاول .. الهوا الطبيعى اللى داخل لفلتر الهوا و منة على بوابة الثروتل و منة على السلندرات
و المصدر التانى … السوبر تشارجر اللى بياخد الهوا المضغوط و يدخلة على السلندرات يقوم يحصل الحرق بشكل اكبر و بالتالى يزيد عزم و قوة العربية
يعنى اكنك دخلت للموتور هوا مرتين فى مرة واحدة يقوم ياخد نفسة بزيادة و يكون فايق كدة معاك و حاضر ?
يعنى هتاخد قوة متضاعفة لان كل لما زاد حرق البنزين كل لما زاد الاداء و عشان الحرق يزيد يبقى لازم الهوا يزيد معاة و اللى هيزود الهوا هو ال
” سوبر تشارجر ”
هوا اكتر = حرق أكبر = عزم اعلى و تجميع اعلى و هورس باور زيادة
طب بيشتغل ازاى ؟
حركتة كلها معتمدة على عمود الكرنك عن طريق سيور زى سير الدينامو و التكييف كدة
مش فاهم .. ?? افهمك ياعم
كومبروسر السوبر تشارجر مربوط بعمود الكرنك
او اللى اسمة Crank Shaft يعنى كل لما زادت حركة عمود الكرنك هتزيد سرعة السوبر تشارجر
ب اختصار .. هو جهاز وظيفتة انة يضاعف الهوا اللى داخل يتحرق فى الموتور يقوم الموتور يبقى قوى و حمامة كدة ??
ميزة السوبر تشارج
انة بياخد قوتة مع دوران الموتور يعنى طول ما الموتور داير السوبر تشارجر شغال و كل لما تدوس بالعربية كل لما قوتة تزيد
ينفع اركبة فى عربيتى ؟
مفيش حاجة مستحيلة بس هتحتاج تعدل حاجات كتير
1 – البساتم
2 – عمود الكرنك هيتغير بالكامل و التقسيمة هتتغير
3 – البلوكة
4 – الشنابر
5 – الفتيس … عشان يستحمل الحرق الزيادة اللى هيحصل …
و طبعا هتعدل حاجات تانية كتير بس دى اهم الحاجات

________________________

” التيربو تشارج “
بص هو ميفرقش كتير عن السوبر تشارجر بس هنقولة برضة ?
ال Turbo عبار عن مروحة قوية
او ممكن نقول عليها ( توربينة Turbine )
مهمتها انها تزود كمية الهوا اللى داخل على السلندر
عشان يزود قوة الحرق داخل السلندر
و بالتالى العزم يزيد و نقدر نطلع عدد حصنة كبير من CC قليل
نتعمق شوية ?
التيربو عبارة عن مروحة مزدوجة على عمود واحد
واحدة متوصلة على العادم ( الشكمان ) و التانية متوصلة على هوا السحب
و لما بتدوس بنزين العادم بيطلع بكمية كبيرة
يقوم التيربو قايل
هو مش خسارة العادم اللى طالع دة يروح فى الهوا كدة و موتور العربية اللى انا راكب فية دة ميستنفعش بية ? يقوم الهوا رادد علية و قايلة و الله مانا كسفك
و يقوم العادم اللى كان طالع دة يدخل على التيربو او turbine و يحرك المروحة التانية اللى بتسحب الهوا واخدة و يدخلة تانى على السلندرات و يحصل الحرق بشكل اعلى و افضل ??
طب ماهو مع الضغط الزيادة دة كلة اكيد الهوا هيسخن و لما الهوا يدخل سخن للموتور هيكون تأثيرة سلبى على ادأئة
هنا بقى يجى دور ” السربنتينة ” او اللى معروف ب اسم ال ” InterCooler ” او
ال ” Heat Exchangerr ” اللى وظيفتة يبرد الهوا اللى داخ على الموتور و يحصل الحرق بشكل اعلى …

لو حبيت تعدل موتورك و تحط علية تيربو
هتحتاج تعدل الكلام دة كلة ..
1 – البساتم
2 – السبايك
3 – جوانات وش السلندر و الفرن و السحب
4 – الشنابر
5 – البلوكة
6 – الفتيس … عشان يستحمل الحرق الزيادة اللى هيحصل …
و طبعا هتعدل حاجات تانية كتير بس دى اهم الحاجات
لو عدلت كل دة هتقدر تحط تيربو غير كدة مينفعش
و العربيات اللى بتنزل من مصنعها تيربو بيكون ال 5 حاجات دول جاهزين فيها ..
التيربو هو اللى لونة ابيض اهو و ال Turbine جواة اهى ?
______________________

طب انهى احسن ؟
التيربو مش بيشتغل غير عند نسبة حرق عالية عشان ياخد الهوا اللى محتاجة عشان يدخلة على الموتور
يعنى ال Turbo مش بيشتغل على عدد RPM قليل
السوبر تشارج … دة قاعد قاطع كدة 24 ساعة ? اول لما الموتور يشتغل يقوم و يصحى من النوم و ينام اول لما تشيل المفتاح من الكونتاك ديما شغال حتى و العربية واقفة بس دايرة
بيطفى لما تطفى العربية ?
طب برضة انهى الاحسن …
و الله كل واحد فيهم ميزة مش موجودة فى التانية
1 – التيربو ميزتة .. انة مش ديما شغال و هيوفر بنزين عشان ديما مش شغال ..
2 – السوبر تشارجر … ميزتة انة ديما شغال بس بالتالى هياكل بنزين اكتر و حمل اعلى على الموتور
عكس بعض يعنى …
الخلاصة ….
السوبر تشارجر و ال تيربو تشارجر فكرتهم واحدة
بس الحوار كلة فى طريقة اداء الوظيفة ??
التيربو محتاج عادم عشان يشتغل ?
السوبر تشارج مش محتاج عادم عشان يشتغل او بمعنى اصح اداء وظيفتة كلها على عمود الكرنك و كل لما تدوس الحرق يزيد
لاكن الاثنين فكرتهم واحدة … انهم يزودة الهوا اللى داخل للموتور عشان الحرق يحصل بشكل افضل يقوم التسارع و العزم يزيد و الهورس باور كمان ?
___________________

مقالات ذات صلة

زر الذهاب إلى الأعلى
إغلاق