العربيه دى فيها Supercharger و دى فيها Turbocharger ياترى ايه الفرق بينهم؟
.
1- Supercharger.
بياخد حركه عن طريق سير من الكرانك شافت و بيتكون من حاجه اسمها (Positive Displacement Compressor) عباره عن حاجه شبه القلوظ زى ماهوه موجود فى الصوره اللى لونه احمر و ازرق المسمارين دول بيلفو وبينهم خلوص الهوا بيبقى بينهم وبيفضل الهوا موجود وعند نقطة الخروج الخلوص بين المسمارين بيقل جدا و دا هيسبب ان الهوا اللى فى الخلوص دا ينضغط بشكل كبير.
طبعا عشان السوبر يشتغل لازم طاقه والطاقه دى جايه من المحرك يعنى جزء من طاقه المحرك هيروح للسوبر عشان يشتغل دا معناه ان القدره الحصانيه للمحرك بتقل عشان انا اخت جزء منها للسوبر طبعا السوبر اعلى فى التكلفه و الوزن والدوشه. (بس صوته احلى ) !!
من مميزات السوبر ان الاستجابه للتغير فى الحمل اعلى بكتير بعنى انك حتس بوجوده و فورا لما تدوس على دواسة البنزين طبعا .
شويه ارقام : الضغط الجوى اللى احنا عايشين فيه هوه 14.7 PSI السوبر لما بيتركب بيضف حوالى من 7 الى 9 PSI لضغط الهوا يعنى (14.7+9:7) ودا هيخلى كمية الهواء اللى داخله للمحرك اعلى و بالتالى وقود اعلى و حرق افضل لنفس السعه اللتريه بعض مصنعين السوبر بيقولوا انه بيزود القدره الحصانيه ل 50% بس تجارب الناس بتقول ان النسبه اقل من دى بحاجه بسيطه.
.
2- Turbocharger.
التربو من اسمه كدا يعنى فيه تربينه او مروحه المروحه دى بتلف عن طريق سريان نواتج الاحتراق من المحرك او العادم التربينه دى متوصله ب مروحه تانيه قدامه اسمها (Compressor wheel) التربينه و الكمبروسر متوصلين عن طريق عمود دوران على كراسى محاور بس من نوع خاص.
فكره عمله برده شبه السوبر ان الخلوص بيقل بين المروحه وبين جسم التربو و دا هيخلى الهوا ينضغط من مميزات التربو انه مش بياخد اى طاقه من المحرك زى ماحنا شوفنا ان بيستخدم طاقه سريان العادم عشان يلف التربينه اللى بتلف مروحه االكمبروسر .
بس فيه حاجه: التربينه بتلف عن طريق سريان العادم سريان العادم و العادم دا بيبقى ليه ضغط ولما العادم بيخش التربينه ضغطه بيبقى عند بوابه التربينه عالى شويه عن الوضع الطبيعى ازاى؟ تخيل مثلا ان فيه فصل مليان تلاميذ و قولتلهم اخرجوا من الباب فى وقت واحد هتلاحظ ان فيه زحمه عند بوابه الفصل (بوابه التربينه ) طب دا هيأثر على المحرك؟ بيقولك الظاهره دى هتقلل القوه الحصانيه للمحرك حاجه بسيطه .
طبعا عشان تبدى تحس بوجود التربو لازم يبقى ضغط العادم عالى شويه عن الوضع الطبيعى بمعنى عدد لفات اعلى للموتر يعنى مش هتبتدى تحس باستجابه التربو الا بعد عدد لفات معينه الظاهره دى اسمها ( Turbo Lag ) طبعا مصنعين التربو حاولوا يطورا فى التربو عن طريق استخدام عماويد دوران من السراميك و سبايك اخف فى الوزن عشان يقلل وزن التربو المصنعين بيقولوا ان التربو بيزود القدره الحصانيه من 30:15 % وبتختلف طبعا على حسب حجم التربو و قدره المحرك.
حاسب :
لو الماتور بتاعك شغال بالبنزين وانت ناوى تركب تربو يبقى لازم تركب معاه حاجه اسمها (Intercooler )ليه ؟ ببساطه عشان الهوا لما بيخرج من التربو بيبقى سخن جدا نتيجه لعملية الانضغاط و ماينفعش يخش المحرك على طول عشان لو دخل على طول وتمت عمليه رش البنزين هيحصل احتراق على طول من غير لما المحرك يستنى الشراره من البوچيه ودا هيعمل حاجه اسمه الدق او كركره (knocking) ودى صوره هوه شبه الراديتر كدا .
