فحص الصاج للعربيات المستعملة

هنكمل النهاردة بقية مواضيعنا في فحص العربيات المستعملة و هنتكلم النهاردة عن فحص الصاج , فحص الرفارف ؛ القشرة الخارجية للأبواب و الكابوت و الشنطة و الشقف و اكصدامات و رفارف …

طبعا لازم الصاج الخارجى كلة يكون سليم و مفهوش اى حكات و خبطاط ملحوظة فى اماكن حساسة بالعربية ..
و انت بتبص على الصاج لازم تكون لماح بمعنى انك تركز فى كل جزء فى العربية من اصغرة ل اكبرة
عشان لو فى حتة واطية او عالية تاخد بالك منها
من حيث رفرف او باب او سقف اكصدام … الخ ?

حاجات لازم تاخد بالك منها وانت بتعمل فحص الصاج

● لو شفت اى جزء فى العربية خالف عن الجزء التانى اللى زية بمعنى الصاج مش راكب مكانة كويس مثلا رفرف مخلوع شوية من تحت و فى بوش خفيف
بينة و بين جسم العربية

● البارومة … دى قصتها كبيرة سواء كانت بارومة كتير او قليلة … لان اصلاحها بيكلف كتير و بوية و معجنة و صنفرة و قصة انت فى غنى عنها

و من اكتر الاماكن اللى بيكون فيها بارومة :
1 – داير الرفرف .
2 – اطراف قشرة الباب .
3 – حلق الازاز اللى قدام و ورا.

● المجارى الخاصة بتسريب ماية الشتا او الغسيل
المظراب يعنى ? و دى بتكون فى اطراف السقف فى الجنب او فى القوايم اللى قدام و على الجناب فى حوض الموتور و الشنطة ..

نقطة كمان ..

مش محتاج اقول ان لازم تكون البوية ممتازة او على الاقل جيدة لانها من الحاجات اللى بتكلف كتير و بتحدد حالة العربية و تمنها
و هنا برضة لازم تكون لماح عشان تلاحظ اى فروق لون فى الدرجة يعنى حتة اغمق من حتى او حتى افتح من حتة
لان معنى ان حتة غامقة او فاتحة او حتى البوية مش فابريكا يبقى العربية دى كانت خبطة و رشت و الافضل تاخد بوهيجى معاك.

حاجة كمان لازم تعملها و دى هتاثر معاك فى العربية كلها مش صاج بس ..
أقف قدام العربية فى النص و مرة تانية ورا العربية فى النص و بص على السقف كويس و دقق و شوف فى اى ميالان على اى جنب ولا لا حتى لو ميل خفيف
لان ممكن يكون السقف معمول فى شغل او كان فى لووحة و استعدل و بالتالى مش هيبقى وازن العربية صح و هيأثر على الثبات بشكل كلى و كمان حالة العربية و سعرها

● شوف فى اى ميل فى الكابوت ولا لا ..
يعنى الكابوت مريح يمين شوية او شمال شوية
مضغوط من نحية اكتر من التانية ..

دقق فى الفرق اللى بين الفوانيس و الشنطة
و بين الفوانيس و الكابوت شوف الفرق اللى فى اليمين قد الشمال ولا لا ؟ لو الاثنين مظبوطين يبقى فل غير كدة يبقى العربية فيها شغل ..

● نفتح الشنطة و نبص عليها من جوة و من الحروف بتاعتها .. و نشوف الارضية بتاعت الشنطة و الاستبن فيهم بارومة او مكان ل اى لحامات ولا لا

و بكدة نكون خلصنا موضوع فحص الصاج …