وش سلندر

فحص العفشة والكاوتش للعربيات المستعملة

 

النهاردة هنتكلم في موضوع مهم ويهم كل الناس وهو ازاي تفحص العفشة والكاوتش لأي عربية مستعملة سواء لتقييم عربيتك او عشان بتشتري عربية مستعمله من اي شخص او من اي معرض ..
هنبدأ بالعفشة و الكاوتش …

 

● ازاى تكشف على حالة المساعدين ؟
هتهز العربية من الاربع جهات
( شمال قدام ؛ شمال ورا ) ( يمين قدام ؛ يمين ورا )
عن طريق انك تيجى فى كل نحية من اللى قولنا عليهم دول تضغط عليها بقوة لو العربية ردت بسرعة يبقى العفشة بتاعت الحتة دى تمام ..
اما لو ردت و نزلت تانى .. فا دة دليل على ان العفشة بتاعت الحتة دى ضعيفة
و هيكون حاجة من الاثنين دول ( ضعف ياى ) او المساعد خلاص الهوا اللى فية فضى و ممكن يجيبو زيت ?

 

●لازم تكون دقيق و متفوتش اى تفصيلة ?
لانك لو فوت حاجة جيبك هيفوت بعد كدة فى العربية اللى خدتها ..

 

● فحص الكاوتش ..


و انت بتفحص حالة العجل من حيث جودة الكاوتش و الجنوط بص فى الكاوتش و خصوصا اللى قدام و شوف اذا كان فى تأكل جزئى ولا لا ؟
شوف الجنط فى حتة متنية و عاوز استعدال ولا لا لان كل دة بيدل على عيوب فى العفشة و ان العربية بتمشى فى بلاوى و صاحبها خابط بالجنط دة مثلا و اتنى منة …

لازم كمان تركز بحيث ان يكون الكاوتش يكون فى النص بظبط .. مش فاهم ?
يعنى بص على المسافات و اتأكد انها متساوية بين العجل و الرفرف من قدام و بينها و بين الرفرف من ورا و لازم العجلة تكون فى منتصف الداير بتاع الرفرف بظبط و مفيش حاجة مرحلة عن التانية
لان لو فى حاجة من الكلام دة موجودة يبقى العفشة منتهية و ممكن تلاقى مشاكل فى الشاسية كمان ?

● خلى معاك كشاف ?
( دة لو هتشوف العربية بليل ) و تبص على المقاصات ..
شوف مثلا فى اى لحام من اى نوع او صدا من اى نوع و تبص على كل اماكن تثبيت الاجزاء ببعضها و الكلام دة كلة مش هيظهر غير و العربية مرفوعة

● العربيات الحديثة دلوقتى ..
هتلاقى تحت الرفارف اسلاك كتير خاصة بنظام التوجية و الحساسات بتاعت الانظمة الالكترونية المرتبطة بالعفشة و الفرامل زى ال ESP و ال ABS .. الخ

دى معظم الحاجات اللى تتشاف و العربية واقفة ..
طب و انا ماشى ? ؟ و دة الجزء الاسهل فى الموضوع

لازم تعرف ان عيوب العفشة مش بتظهر غير و العربية ماشية مع المطبات بتاعتنا و البلاعات ?

1 – ناخد كام بلاعة و مطب
( براحة طبعا عشان صاحب العربية ميزعلش مننا ) ??
و نلاحظ مدى تماسك العفشة و العربية ككل و درجة احساسك بالمطب يعنى الصدمة بتجيلك جامدة ولا بتحس ان فى تناغم كدة و العفشة شايلك عنك ? ولا رايحة فى داهية و تحس بكل حاجة

2 – اقف بالعربية و خلى الموتور داير و لف الطارة يمين و شمال لحد الاخر ( لحد لما الدريكسيون يقف ) لازم متسمعش صوت اى طقطقة او تكتكة
لان الصوت دة لو موجود معناة ان الكبالن بتودع
لازم متسمعش حاجة غير صوت احتكاك الكاوتش

و لو كانت العربية ( باور ستيرنج )
تشوف لو الدريسيكون فى هزة ولا لا حتى لو بسيطة و شوف لما تجيبة لحد الاخر بيرجع حبة ولا بيفضل ثابت على مكانة …
لان لو رجع من مكانة او بيتهز دة دليل على حاجتين
ان الاسكترا اللى ماسكة الدريسيكون و توجية العربية فيها مشكلة او ان طلمبة الباور نفسها فيها مشكلة ? ..

أصحى  كدة و ركز ??

اللى هقولة دة دلوقتى تجربة شخصية حصلت معايا

دا أول أحتبار ممكن تعمله 
كان فى عربية مستعملة والدى كان هيشتريها
فاخدنى معاة ?
و طلعت انا و صاحبها نجرب
مشينا على الكورنيش و فتحت تالت بالعربية فى رابع و كانت مانيوال .. و سبت الدريكسيون ?
ايون سبتة خالص ?
صاحب العربية بقى يبصلى كدة ???
هوووب و انا سايب الدريسكيون الاقى العربية بتحدف شمال و الطريق كان ( مستقيم ) قولت مفيش مشاكل عاوزة ظبط زوايا بس كانت بتحدف حدفة غير حدفة الزوايا فشكيت فى العربية لانها كانت بتحدف ب زاوية كبيرة نوعا ما مش زاوية ظبط زوايا ابدا …
قولت عشان مظلمش صاحبها او اعيب على العربية و هى سليمة و تبقى العربية ضاعت مننا و فى نفس الوقت اتهمت صاحبها قولنا نكشف عليها ..
طلع فيها الأتى ?
1 – مغيرة كوبلن
2 – مغيرة مقص ..
3 – جايبة فردة شاسية شمال ? و فى فتحة هى دى اللى عملت معايا الحدفة الشمال
و الشاسية عاوز حاجة اسمها ( مرستة هوا )
يعنى هيسخن فى الشاسية و يدق علية و يستعدل و يرش ( هترش دواخل ) و ليلة كبيرة و كنا احنا اللى هنلبس العربية و كانت معرضة فى اى وقت ان الشاسية يفتح و هى ماشية فى اى وقت و تروح شمال و مهما تجيب يمين بالدريسكيون مش هيعمل حاجة و تخبط ??

الخلاصة من الموضوع دة انك تمشى بالعربية فى طريق مستقيم و تسيب الدريكسيون و تشوف العربية هتحدف يمين او شمال .. لو حدفت يبقى تكشف عليها او تفكك منها خالص ?

دا بقي الأختبار التانى

نفس فكرة الموقف اللى حصل معايا و الاحسن متعملوش غير برضة فى طريق مستقيم و تكون واثق من سواقتك ..
هتجيب سرعة مش اقل من 70 و مش ازيد من 80
و هتمور العربية و لو اوتو هتجيب الفتيس على ال NN و هتحط فرامل لحد الاخر بس مش كلبشة يعنى تتقل رجلك على البدال بس بسرعة و فى نفس الوقت بهدوء ( و هتكون سايب الدريكسيون خالص ) ?
لو العربية انحرفت يمين او شمال حاجة بسيطة متقلقش دة طبيعى نتيجة انك سايب الدريكسيون
اما لو حدفت حدفة جامدة يبقى تروح جاى ماسك الدريكسيون بسرعة و عادل العربية و تركن و تقول لصاحبها واحد سلام عليكم ? او سيرفو فى مشكلة و مش بيوزع ضغط الزيت مظبوط او طنبورة متاكلة و بتودع

و انت ماشى شوف كدة اى U Turn تلفة بالعربية و انت بتلف زود سيكة بنزين خفيفة ?
لو سمعت صوت طقطقة يبقى دى كبالن
و حتى فى ملفات الطريق العادية …

ملحوظه أخيرة …

لو انت رايح تشوف عفشة عربية جنطها كبير
يعنى مثلا جنط 17 زى بتاع الريو و السيراتو او حاجة المانى
طبيعى تحس بالمطبات لان اى عفشة عليها جنط كبير بتكون ناشفة
و لو عليها عفشة سبور بتكون برضة ناشفة

و بكدة اكون خلصت و عملنا Check للعفشة …
طبعا الكلام دة لو فى اى حاجة موجودة فى العربية مشكلة فى العفشة يعنى دة مش هيعيب العربية بس هيديك فرصة تقلل من تمنها ..
ودي مقالات متعلقة بالموضوع وفي نفس السياق بتاع فحص العربيات المستعملة
لو عاوز تعمل فحص للموتور 

لو عاوز تعمل فحص للفتيس المانيوال

لو عجبك الموضوع يبقي شير في كل مكان بقي عشان الكل يستفيد

لو في اي حاجه عايز تعرفها ممكن تسيبلنا تعليقك هنا واحنا هنرد عليك …

الوسوم

مقالات ذات صلة

زر الذهاب إلى الأعلى
إغلاق