نقول شوية نصائح تاخد بالك منها فى الجون مبتطلعش غير للشعب وش سلندر العظيم
بص بقا يابرنس الليالى هتتفرج على العربية يبقا تاخد بالك من شوية حجات كده وهبه هيقولك عليها
1- مش من المستحسن انك تشترى عربية راشة جوا (يعنى راشه دواخل زى حوض الموتور وداير الباب والشنطة ) لان العربية بتبقى عاملة حادثة محترمة ورحت عند الاسطى رفرف السمكرى قعد يستعدلها ويعملها زراجين واترشت عشان تدارى اماكن اللحمات وبتبقى واخده معجون وانت من الاخر مش مجمع مبلغ بطلوع الروح عشان تروح تشترى عربية بالحالة دى
٢ – نيجى بقى للنظرات الفنية افتح الكبوت بص على فردة الشاسية كويس شوفى فيها خبطه واخدة لحام او في حتة مكسورة فى فرق جامد بين الفوانيس والرفارف او فى رفرف مش مستريح مش قاعد صح فى مكانه او الكبوت نفسه واخد بنط لحام او معجون كل دى علامات ان العربية اتعمل فيها شغل قبل كده من قدام او كانت واخده خبطه جامدة والسمكرى معرفش يقفل صح وبردوا القى نظره خاطفه على الشنطة لو لاقيت ارضية الشنطة فى حاجه زى كرمشة كده اعرف ان العربية كانت مخبوطة جامد من ورا ودا هياثر على العفشة وهيخلى العربية عربية مش تمام وسيبك منها
٣ _نيجى للقلب بقا ( الموتور ) تدور الموتور تسمع صوته لاقيت ( دخنة _ ترزيع _ نقر ) اخلع من العربية دى بص على الموتور لاقيته غرقان زيت اعرف ان الموتور بينفخ وهيبدا يطلب طقم شمبر كمان خد مقاس زيت للعربية شوف اخبار الزيت ايه
٤_ وحياة عيالك ياشيخ بص على الضفيره اللى فى الحوض كويس واللى تحت الطابلوه لو لاقيت وصلت كتير وشريط لحام كتير اعرف الاسطى لمبة الكهربائى عمل واجب مع صاحب العربية جامد ولو هى كمبيوتر وبخاخ سيبك منها عشان هتتعبك ( ودا لمصلحتك والله التباع استايل )
٥ – العربية اللى راشة حزام نضافه من برا مش كخه والله معظم دهان العربيات دلوقتى كلة ميتالك وبيبقى صعب ان رفرف او باب اتحك يترش بنفس درجة اللون تانى لان بتاع البويات حتى لو شغال بكمبيوتر مش هيديك بويه نفس الدرجه بالملى فبيبقى الحل ان العربية تترش حزام نضافه
٦ – نيجى بقى للفتيس لو مانيوال المفروض تدوس دبرياج وتدى كل الغيارات من غير ما فى غيار يزعق او يطلع صوت او يرد تانى لوحده لو اوتو اطلع جرب العربية المفروض الفتيس يقلب الغيارات معاك و ميطولش ولا تحس بهبدا جامدة فى تقليب الفتيس ولو استيبترونك جرب الغيارات بتاعته بردوا وخد مقاس زيت للفتيس بردوا
7 – مطب ناس كتير اوى بتقع فيه وانه يشترى العربية والتكييف بتاعه عطلان على انه عايز يتشحن لوسمحت قبل ما تشترى العربية خد صاحبها واطلعوا اشحنوا التكييف عشان تضمن انت حقك احنا بيجلنا فى المركز الحركة دى كتير اوى وفى الاخر تلاقى الكباس بتاع التكييف مفوط وسرفنتينا مثقوبة وعايزه تتغير وشوية مصاريف عنب
8-اركب العربية واطلع جرابها وشوف فى اصوات غريبه انت سامعها او العربية بتحدف ولا حاجه وجرب فراملها كويس وتاكد منها وبص على العدادات كويس شوفها كلها شغاله فى عداد بيعلق ولا لا وكل الوظائف جوا العربية شغاله ولا لا وطبعا مش عايز اوصيك متدفعش مليم واحد ولمبة Check Engine منورة (وانتشر فى قلب المكان يعنى بصوت اللمبى)
9 – متسمعش كلام صاحب العربية اللى انت شاريها منه يقولك انا لسه مغير مش عارف ايه وعامل ايه ومخليها طيارة قوله طيب وخد المفتاح واطلع على مركز الصيانة اللى انت بتتعامل معاه واعمل طقم سيرفيس كامل للعربية لان دا هيزود ثقتك فى العربيه وهيخليك فى امان كل النصايح دى للناس اللى هتشترى مستعمل ومعاه مبلغ عايزه تحطه فى عربية مره واحده من غير تكالييف تانى انما فى ناس تانيه بتحب وبتتلذذ تشترى اللى فيه مشاكل عشان تقلل فى تمنه و فى الاخر بيتعبوا من جريهم ورا الصنايعية عشان يخلصوا مشاكل العربية وبيدفعوا فلوس عنب والصنايعى من دول يقولك (عملنا شوية فلوس زى الفل احسن) بصوت مرجان احمد مرجان طب ولية دا كله ما تريح نفسك واعمل بالنصايح دى واشترى دماغك بقى يا أخى
