نصائح لفحص السيارة المستعملة
شوية نصائح لفحص السيارة المستعملة تاخد بالك منها كويس :
وأنت رايح تشوف عربية مستعملة عارفكم أنا تموتوا في النصايح !
بص بقى يا برنس الليالي هتتفرج على العربية وتاخد بالك من شوية حاجات #وش_سلندر هتقولك عليها
1 – مش من المستحسن إنك تشتري عربية راشة دواخل زي حوض الموتور وداير الباب والشنطة
طب لية ؟ لإن العربية بتبقى عاملة حادثة محترمة وراحت عند الأسطى رفرف السمكري قعد يستعدلها ويعملها زراجين وأترشت عشان تداري أماكن اللحامات وبتبقى واخدة معجون وأنت مش مجمع مبلغ بطلوع الروح عشان تروح تشتري عربية بالحالة دي وكمان مش بتبقى عربية فيها أي نوع من أنواع السيفتي مع الإستخدام هتظهر عيوبها !
2 – نيجى بقى للنظرات الفنية
أفتح الكابوت بص على فردة الشاسية شوف فى لحامات من اى نوع
شوف فى فرق بين الفوانيس و الكابوت و الاكصدام ولا تمام .. و شوف الفوانيس اللى ورا بايتة صح فى مكانها و مطبعة مع الشنطة ولا فى حاجة خالفة ..
شوف فى اى عجل مرحل من مكانة ولا تمام
اقف قدام العربية من النص بظبط و بص على السقف شوفة معووج مثلا او مميل سنة يميل او سنة شمال ولا حتة واحدة و مستوى
و ارجع ورا العربية فى نصها بظبط و بص على السقف برضة …
عشان كان ممكن تكون عاملة حادثة و العربية
( اتفتلت ) و اتظبطت بس مش اوى و بتبان من السقف
ركز هااا ركز ياسطى
نيجى للموتور …
تدور كدة تسمع صوتة المفروض يبقى هادى مش عالى و ال RPM عدد لفاتة قليلة
و المفروض متشوفش الكلام دة او تسمع
( دخنة ؛ ترزيع ؛ نقر ؛ صوت سيور خشنة )
بص على الموتور لو لاقيت علية زيت أعرف ان الموتور بينفخ و داخل على طقم شمبر
و لازم كمان الدوارة تكون حاضرة معاك و العربية بتدور من أول مرة ..
● بص على الضفيرة فى سكتك و الله
فين الضفيرة دى و اية هى اصلا ؟
هى نقطة تجمع سلوك العربية و فيها كل التوصيلات الكهربائية لازم تلاقى السلوك كلها فى انابيب مطاطية و متغلفة ..
تفتح الحوض تشوف فى اى سلوك هربانة من مكانها ولا الدنيا تمام
تشوف فى سلوك مش راكبة خالص و مرمية فى الحوض و خلاص … ولا الدنيا تمام
و تبص على علبة الفيوزات و السلوك اللى بتبقى جوة فى العربية تحت الدريسيكون شمال فوق الركبة
لو لاقيت وصلات كتير ملخفنة
و معمول كبارى و حاجات متوصلة على الفاضى
يبقى دى راحت عند اسطى لمبة الكهربائى و عمل واجب مع صاحب العربية ?
● العربية اللى راشة حزام نضافة مش كخة و الله المهم بس يكون حزام نضافة فعلا
متكنش راشقة و عاملة حادثة و اتعملت صح و صاحبها بيقولك مرشوشة نضافة ( الحل انك تكشف عليها )
و تعمل الكلام اللى بنقولة دة ..
● نيجى للفتيس ..
لو مانيوال يبقى لازم تدوس دبرياج و تجرب كل الغيارات و المهم ان الفتيس يكون سلس معاك و بينقل بسهولة … و مينفعش و انت بتدى غيار يرد عليك لوحدة يعنى مينفعش مثلا تكون بتجرب التالت يروح رادد للتانى .. اخلع احسن
طب لو اوتو ؟ لازم بقى تطلع تجرب
لازم تلاحظ ان الفتيس نفسة مش طويل فى النقلة بينقل بسرعة يعنى و سلس
مفهوش صوت خشونة و انت بتنقل من D ل R او اى ترس عموما .. ولا تحس بهبدا جامدة فى تقليب الفتيس ..
●○● مطب ناس كتير اوى بتقع فية
و انة يشترى العربية و التكييف بتاعها عطلان على انة عاوز يتشحن ياريت قبل ما تشترى العربية تجرب التكييف …
و لو قالك دة عاوز يتشحن قولوا ماشى و خدة و اطلع و اشحنوا عشان تضمن حقك احنا بيجلنا فى المركز الحركة دى كتير اوى ..
و فى الاخر تلاقى الكباس بتاع التكييف مفووت و السربنتينة مخرومة و عاوزة تتغير
● اركب العربية و اطلع جربها دة حقك
و شوف فى اى اصوات غريبة ولا لا او بتحس بالحاجات دى
زى مثلا
( تزييق ؛ خشونة ؛ طقطقة ؛ رعشة ) العربية مع الفرامل بتحدف شمال او يمين
شوف فى اى عدادات معلقة و جرب كل الزراير و الانظمة شوفها شغالة ولا لا و لو فى فتحة سقف شغلها و جربها .. و لاقيت اللمبة الملعونة و هى المعروفة ب Check Engine يبقى تبعد عن العربية فورآ
حاجات لازم تكون واخد بالك منها
1 – لو هتشترى العربية عن طريق وسيط ( معرض )
و معادك مثلا الساعة 7 لا روح انت من 5 ونص اركن هناك عشان متديش فرصة لصاحب العربية يعمل مصلحة عليك مع صاحب المعرض فى اى حاجة ..
2 – حقك تجرب العربية و تروح تكشف عليها فى اى مكان و لو طلع اى حاجة تمن الكشف بيكون على صاحب العربية .. و لو العربية سليمة تمن الكشف بيكون عليك ..
3 – و انت بتشترى العربية أذكر كل حاجة فى العقد سواء ليك او عليك ..
4 – أتاكد ان العربية ليها ملف فى المرور التابع ليها
و بكدة نكون خلصنا ..
