نصائح هامه

نـصائح للـمبتدئين في الـقيادة ..

 

نـصـيحة رقـم 1 
رجلك على الفرامل واضغط دبرياش وانت بتعدى على اى تقاطع او اى يو تيرن او زحمة عربية
لو ظهر لك اى حاجة هاتضغط على الفرامل على طول
عشان فى اى وقت وقفت انقل الغيار ببساطة والعربية ماتبطلش
ولو حصل وظهر لك اى شىء مفاجىء رجلك اساسا على الفرامل مافيش اى مشكلة هاتضغط عليها
لكن لو رجلك على البنزين مع الخوف هاتضغط على البنزين وتحصل مشكلة لا قدر الله

طبعا التدريب بيكون عـليها ازاى ؟ تتحكم فى سرعة العربية عن طريق الفرامل
تفضل تضغط عليها براحة لحد ما تاخد العربية السرعة المناسبة
مثلا اليو تيرن لازم اكون داخل براحة قوى
الملفات لازم اكون داخل عليها براحة قوى
التقاطعات لازم اكون مهدى العربية كويس
واى مكان فيه زحام متوقع

النصيحة الـثانية 
اى ملف لازم تكون هادىء جدا فى سرعتك وتكون داخل الملف فى حارتك “طبعا فى الغالب بجوار الرصيف”
واوعى تخرج من حارتك اللا بعد ما العربية ما تعدل نفسها
وقبل ما تدخل الملف لازم تبص على الناحيتين يمين وشمال

يعنى لو داخل يمين بص شمال بسرعة على العربيات اللى جاية
وارجع بص امام عربيتك
اوعى تنسى وتفضل باصص على العربيات اللى جاية من الشمال
لحد ما عربيتك تنزل نص الشارع
نفس الكلام لو داخل شمال

وطبعا والعربية بتلف تكون محضر الغيار المناسب عشان تمشى على طول وطبعا مدام رجلك اصلا ضاغطة على الدبرياج هاتقدر تختار الغيار المناسب بسرعة 
واوعى تنقل نفسك من الحارة اللى بجوار الرصيف فجأة دون النظر فى المرايات

اما لو كنت بتعمل يوتيرن
وكنت فى الحارة الخارجية وليست الحارة التى بجوار الرصيف
نفس الكلام لازم تفضل ملتزم بها
واوعى تخرج منها حتى بعد ما تلف بالعربية اليو تيرن
عشان ماترميش نفسك على اى عربية تانية

النصيحة الـثـالثـة
الالتزام بالحارة التى تسير فيها
يعنى  الخط اللي موجود بين كل حارة و التانية دة اللى بيفصل بينك و بين اي حارة
اوعى تمشى على الخط
لان كده معناه انك شاغل حارتين
والعربيات عشان تعدى منك لازم تعملك كلاكس وتسبب لك ازعاج
عشان كده لازم تمشى داخل حارتك تماما وليس على الخط الموجود بين الحارتين

النصيحة الـرابعة
لو مـاشي في طريـق سـريع و أنت لسة مش بـتعرف تـجري أوي يبقي 

تمشي في الحارة اليمين و تـشغل الانتظار و تمشي بهدوء براحتك 

النصيحة الـخامسة

بلاش تـغير أتجاة عـربيتك من حارة لـحارة مـنغير ما تلمح بعينك المرايات و تشوف حد جاي من وراك في الحارة اللى انت عاوز تدخل فيها ولا لاء و طبعا بتنقل من حارة لحارة تدريجيـاً مش مرة واحدة و علي سرعة و يبقي افضل لو تشغل اشارة 

النصيحة الـسادسة 

لو حصل وكنت عايزة تقف مرة واحدة او هاتنقل نفسك من حارة الى حارة او هاتلف فى يو تيرن
لازم تنظرفى المراية كويس وتشوف مين اللى جاي وراك او بجوارك … ودى اصعب حاجة “موضوع استعمال المرايات”
خصوصا ان المرايات فيها نقاط عمياء لا تظهر فيها السيارة الموجودة بجوار الباب الخلفى
ولما تنقل نفسك من حارة الى حارة تفاجئى بأن فيه عربية بجوار الباب الخلفى وانت موش شايفاها
 دى بقي بالممارسة والتدريب الجيد جدا جدا لازم تراعى الموضوع ده لانه بيحصل منه مشاكل كتيير

النـصيحة الـسابــعة 

حاول تـنزل بالعربية في وقت متأخر أو الصبح بدري اوي عشان الطرق تبقي فـاضية شوية 

و تاخد شوية ثقة في السواقة و تتـعود عـلي الطـرق 

النصيحة الـثامنة

لو حبيت تركن عربيتك اركن فى مكان واسع فى الاول
لحد ما تتعلم الركنة كويس
ما تحاولش تركن فى مكان ضيق وانت لسه بتتعلم عشان ماتخبطش عربيتك وعربيات ناس تانية من اللي حواليك 

فى البداية أنت مش مطلوب منك انك تجرى بالعربية
كفاية انك تمشى بها حوالى علي 60 فل اوي 
لحد ما تتعود على المشى كويس
وتنقل الغيارات بسهولة
وتقدر تقف لو ظهر اى حاجة مفاجأة
السرعة مطلوبة فى نقل الغيار المناسب وليس الجرى بسرعة
السرعة مطلوبة فى اختيار المكان المناسب للسير عشان مااعطلش باقى العربيات

والنصيحة التاسـعة
لازم يكون بينك وبين السيارة التى امامك مسافة
لازم تحافظ على المسافة دى

والنصيحة العـاشرة 
لو ماشى فى طريق طوالى ممكن ترفع رجلك عن البنزين عشان السرعة تخف
دون الحاجة الى الضغط على الفرامل

الفرامل فقط فى التقاطعات والزحام واليو تيرن رجلك لازم تكون عليها ومستعدة
والتوقف لا يكون مفاجىء بل تدريجى
بعد التدريب هاقدر تعرف قوة فرامل عربيتك وتحس بها

النصيحة الـ 11 

لو هتعدى مطب صناعى لازم تكون ضاغط على الدبرياش والفرامل
وعن طريق الفرامل تتحكم فى سرعة العربية
واول ما عجل العربية الامامى يكون فوق المطب وهايبدأ ينزل
تكون اخترت الغيار المناسب “الغيار الاول او الغيار الثانى” حسب سرعة العربية
وطبعا ما دمت انت دايس على الدبرياج اساسا
خلاص هاتختار الغيار المناسب وهاتمشى على طول
لدرجة ان العربيات اللى وراك مش هتحس انك مبتدأ

النصيحة الـ 12 

احترس من اى عـربية بتركن او خارجة من جراج او بتفتح الباب
احترس من الاطفال وتحركهم المفاجىء
احترس من سيارات الاجرة والميكروباص  لانهم بيقفوا مرة واحدة ومتكرر وفى اى مكان بدون تحذير

 

 

 

تابع أيضاً هذا :  تحذير.. الإرهاق يعادل تأثير الكحوليات أثناء قيادة السيارة

مقالات ذات صلة

اترك تعليقاً

زر الذهاب إلى الأعلى
إغلاق