فحص العفشة والكاوتش للعربيات المستعملة

0 174

فحص العفشة والكاوتش للعربيات المستعملة

النهارده هنتكلم فموضوع مهم ويهم كل الناس وهو إزاي تفحص العفشة والكاوتش لأي عربية مستعملة سواء لتقييم عربيتك أو عشان بتشتري عربية مستعمله من أي شخص أو من أي معرض !

 

● إزاي تكشف على حالة المساعدين ؟

هتهز العربية من الأربع جهات
( شمال قدام ؛ شمال ورا ) ( يمين قدام ؛ يمين ورا )
عن طريق إنك تيجى فكل نحية من اللي قولنا عليهم دول تضغط عليها بقوة لو العربية ردت بسرعة يبقى العفشة بتاعت الحتة دي تمام ..
أما لو ردت و نزلت تانى !؟ فده دليل على إن العفشة بتاعة الحته دي ضعيفة
وهيكون حاجة من الأثنين دول ( ضعف ياي ) أو المساعد خلاص الهوا اللى فية فضى وممكن يجيبو زيت

● لازم تكون دقيق ومتفوتش أي تفصيلة …

لأنك لو فوت حاجة جيبك هيفوت بعد كدة في العربية اللي خدتها ..

فحص الكاوتش ..

وإنت بتفحص حالة العجل من حيث جودة الكاوتش والجنوط بص فالكاوتش وخصوصا اللي قدام وشوف إذا كان في تآكل جزئي ولا لأ ؟
شوف الجنط في حته متنيه وعاوز إستعدال ولا لأ لأن كل ده بيدل على عيوب فالعفشة وإن العربية بتمشي فبلاوي وصاحبها خابط بالجنط دة مثلاً وأتتنى منه …

لازم كمان تركز بحيث إن يكون الكاوتش يكون فالنص بظبط .. مش فاهم !؟
يعنى بص على المسافات وإتأكد إنها متساويه بين العجل و الرفرف من قدام وبينها و بين الرفرف من ورا ولازم العجلة تكون في منتصف الداير بتاع الرفرف بظبط و مفيش حاجة مرحلة عن التانية
لأن لو في حاجة من الكلام ده موجودة يبقى العفشة منتهية وممكن تلاقي مشاكل في الشاسية كمان  !

● خلي معاك كشاف !
( ده لو هتشوف العربية بليل ومنصحكش تبص على عربية بالليل ) و تبص على المقاصات ..
شوف مثلاً في أي لحام من أي نوع أو صدا من أي نوع وتبص على كل أماكن تثبيت الأجزاء ببعضها والكلام ده كلة مش هيظهر غير والعربية مرفوعة

● العربيات الحديثة دلوقتي
هتلاقي تحت الرفارف أسلاك كتير خاصة بنظام التوجية و الحساسات بتاعت الأنظمة الإلكترونية المرتبطة بالعفشة والفرامل زى ال ESP و ال ABS .. إلخ

دى معظم الحاجات اللي تتشاف والعربية واقفه

طب وأنا ماشي  ؟ ودة الجزء الأسهل في الموضوع

لازم تعرف إن عيوب العفشة مش بتظهر غير والعربية ماشيه مع المطبات بتاعتنا و البلاعات  !

1 – ناخد كام بلاعة ومطب
( براحة طبعا عشان صاحب العربية ميزعلش مننا )   !
ونلاحظ مدى تماسك العفشة والعربية ككل ودرجة إحساسك بالمطب يعنى الصدمة بتجيلك جامدة ولا بتحس إن فى تناغم كدة و العفشة شايلك عنك  ولا رايحة فداهية وتحس بكل حاجة !

2 – أقف بالعربية وخلي الموتور داير ولف الطارة يمين و شمال لحد الآخر ( لحد لما الدريكسيون يقف ) لازم متسمعش صوت أي طقطقة أو تكتكة لأن الصوت دة لو موجود معناة إن الكبالن بتودع ولازم متسمعش حاجة غير صوت إحتكاك الكاوتش ولو كانت العربية ( باور ستيرنج )
تشوف لو الدريسيكون في هزة ولا لأ حتى لو بسيطة وشوف لما تجيبة لحد الآخر بيرجع حبه ولا بيفضل ثابت على مكانه !
لأن لو رجع من مكانة أو بيتهز ده دليل على حاجتين !
إن الإسكترا اللي ماسكة الدريسيكون وتوجيه العربية فيها مشكلة أو إن طلمبة الباور نفسها فيها مشكلة  !

أصحى كدة وركز   !

اللي هقوله ده دلوقتي تجربة شخصية حصلت معايا

ده أول أختبار ممكن تعمله !

كان في عربية مستعملة والدي كان هيشتريها
فأخدني معاه  ! وطلعت انا و صاحبها نجرب
مشينا على الكورنيش و فتحت تالت بالعربية فرابع وكانت مانيوال .. و سبت الدريكسيون  !
أيون سبته خالص  !
صاحب العربية بقى يبصلي كدة    !
هوووب وأنا سايب الدريسكيون ألاقي العربية بتحدف شمال والطريق كان ( مستقيم ) قولت مفيش مشاكل عاوزة ظبط زوايا بس كانت بتحدف حدفة غير حدفة الزوايا فشكيت في العربية لأنها كانت بتحدف بزاوية كبيرة نوعا ما مش زاوية ظبط زوايا أبدا !
قولت عشان مظلمش صاحبها أو أعيب على العربية وهي سليمة وتبقى العربية ضاعت مننا وفنفس الوقت إتهمت صاحبها قولنا نكشف عليها ..
طلع فيها الأتى  !
1 – مغيرة كوبلن
2 – مغيرة مقص
3 – جايبة فردة شاسية شمال  ! وفي فتحة هي دي اللي عملت معايا الحدفة الشمال
والشاسية عاوز حاجة اسمها ( مرستة هوا )
يعنى هيسخن فالشاسية ويدق عليه ويستعدل ويرش ( هترش دواخل ) وليلة كبيرة وكنا إحنا اللي هنلبس العربية وكانت معرضة في أي وقت إن الشاسية يفتح و هي ماشية في أي وقت وتروح شمال ومهما تجيب يمين بالدريسكيون مش هيعمل حاجة و تخبط    …

الخلاصة من الموضوع ده إنك تمشي بالعربية في طريق مستقيم وتسيب الدريكسيون وتشوف العربية هتحدف يمين أو شمال .. لو حدفت يبقى تكشف عليها أو تفكك منها خالص  !

ده بقي الأختبار التاني

نفس فكرة الموقف اللي حصل معايا والأحسن متعملوش غير برضو فطريق مستقيم وتكون واثق من سواقتك !
هتجيب سرعة مش أقل من 70 ومش أزيد من 80
وهتمور العربية ولو أوتوماتيك هتجيب الفتيس على ال N وهتحط فرامل لحد الآخر بس مش كلبشه يعني تتقل رجلك على البدال بس بسرعة و فى نفس الوقت بهدوء ( و هتكون سايب الدريكسيون خالص )  !
لو العربية إنحرفت يمين أو شمال حاجة بسيطة متقلقش دة طبيعي نتيجة إنك سايب الدريكسيون
أما لو حدفت حدفة جامدة يبقى تروح جاي ماسك الدريكسيون بسرعة وعادل العربية وتركن و تقول لصاحبها واحد سلام عليكم  !

أو سيرفو في مشكلة ومش بيوزع ضغط الزيت مظبوط أو طنبورة متاكلة وبتودع

وأنت ماشي شوف كدة أي UTurn تلفه بالعربية وإنت بتلف زود سيكة بنزين خفيفة  !
لو سمعت صوت طقطقة يبقى دي كبالن
وحتى فملفات الطريق العاديه

ملحوظه أخيره :

لو أنت رايح تشوف عفشة عربية جنطها كبير
يعنى مثلا جنط 17 زي بتاع الريو و السيراتو او حاجة ألماني
طبيعى تحس بالمطبات لأن أي عفشة عليها جنط كبير بتكون ناشفة
و لو عليها عفشة سبور بتكون برضة ناشفة

و بكدة أكون خلصت و عملنا Check للعفشة

اترك تعليق