وش سلندر

نـصائح مـهمة عـند شراء سـيارة مـستعملة

1 – إتأكد أن العربيـة مش عـاملة أي حادثة و مفهاش أي لحامات و اتاكد ان رقم الشاسية اللى فيها هو اللى مـطابق لمـلفها في المرور و ورق العـربية 

2 – أمشي بالعـربية و أتاكد ان لو الفتيس اوتوماتيك انة بياخد كل الغيارات و مش بيتأخر في النـقل غير لو انت بتـحرق عليها .. و أن لو العربية مانيوال أتاكد ان الفتيس مش بيتهز و العربية علي السلانسية و العصاية مش بترجع مكانها لوحدها 

3 – راجع علي جميع سـلوك و اوبشن و وظايف العربية و بص علي ضفيرة الكهرباء شوف فيها اي وصلات خارجية ولا لاء و متقفلة صح ولا عليها لزق و شيكارتون ولا لاء .. جرب فتحة السقف لو فيها و جرب جميع الانوار و الكاسيت و 4 زجاج بتوع العربية و جرب المساحات و كل حاجة بتـشتغل بالكهرباء 

4 – راجع علي عـفشة العـربية من حيث انك يكون ليـك نظرة ان العربية مثلا و هي واقفة علي ارض مستوية حاول تلاحظ العربية مايلة من جنب عن التاني ولا لاء 

5 – أبعد كام متر كدة عـن العربية و بص علي السقف و الكبوت و حاول تلاحظ اذا كان الكابوت مايل من جنب عن التاني ولا لاء 

6 – شوف داير الرفرف ماشي مع الكابوت و الفوانيس ولا لاء و ان مفيش اي مساحة بينهم او فروقات و بص عند الشنطة و حاول تلاحظ اذا كان فية فروق بين الشنطة و الفوانيس ولا لاء 

7 – نفتح الشنطة و نبص عليها من جوة و من الحروف بتاعتها .. و نشوف الارضية بتاعت الشنطة و الاستبن فيهم بارومة او مكان لـ اى لحامات ولا لاء 

8 –  مش محتاج اقول ان لازم تكون البوية ممتازة او على الاقل جيدة لانها من الحاجات اللى بتكلف كتير و بتحدد حالة العربية و تمنها
و هنا برضة لازم تكون لماح عشان تلاحظ اى فروق لون فى الدرجة يعنى حتة اغمق من حتى او حتى افتح من حتة
لان معنى ان حتة غامقة او فاتحة او حتى البوية مش فابريكا يبقى العربية دى كانت خبطة و رشت و الافضل تاخد بوهيجى معاك 

9 – راجع علي الاماكن دي عشـان بيبقي فيـها بارومة 

  • داير الرفـرف 
  • أطراف قـشـرة البـاب 
  • حـلق الازاز اللى ورا و قدام   

10 – دور العربية و سخنها و روح على الموتور اسحب مقاس الزيت و خد من الزيت على صوابعك و افركة ب ايدك لو لاقيت ان فى رايش او بودر خفيف كدة
يبقى تخلع على طول يا كبير …
طب لية ؟
ده معناه أن في تأكل داخلي في سيبيكة الموتور و داخل على عمرة قريب حتى لو الشكمان بتاعه سليم و صوته حلـو لان صوت السبيـكة مش بيسمع غير لما بيكون التأكل فيها جامد 

11 – قبل م تدور العربية أفتح الريداتير نفسه أو قربة المياه و ركز فى منسوب الماية كويس و لاحظ بعد م تدور لو الماية ذى ما هي منزلتش شوية أو نزلت حاجة بسيطة يبقى زي الفل , أما لو منسوبها زاد ف القربة أو عليت أوي ف الريداتير بلغ فرار على طول لان ده معناه أن في تسريب لكبس الموتور لدورة التبريد و داخل على كارثة قريب أقلها جوان وش و أنت طالع يا كبير
ولازم برضه تتأكد أن المياه بتجري ف الردياتير أو بترعش شوية ف القربة مما يدل أن طلمبة الماية شغالة كويس لان لو لاحظت أن المياه ثابتة و مش بتتحرك ده معناه أن الطلمبة رايحة ف داهية و العربية بتسخن و بلاش توجع دماغك … 

12 – راجع عـلي الفرش الداخلي للـعربية من كراسي و كنبة و تابلوة … بص على الكسوة الخاصة بالسقف و القوايم فى أغلب العربيات فى غطا فيبر للقوايم لازم تعمل فحص علية كويس اوى لانة دة اللى بيحتوى على الـ احزمة الامان و فى العربيات الغالية و الحديثة بيكون فيهم Airbags , و أتاكد من جميع المقابض اللى فوق الباب اللى فى السقف و مفهاش اى لخلخة و متثبتين كويس  

13 – شـوف حرارة المـوتور لو عالية اسأل عن السبـب 

14 – تـبص في حوض العـربية علي أي اثار للبـوية يعني تبص علي الضفيرة و الكارتيرة و البطاحات و صدر العربية و فرد الشاسية و اهم حاجة فرد الشاسية لو في اي اثار للبوية ابعد عن العـربـية دي 

15 – تـجربة السـواقة .. سوق العـربية و جربها و امشي بيها كتير و ركز مع الاصوات اللى هتسمها امشي في شوارع مكسرة و خد مطبات و ركز مع صوت اي طقة او تخبيط او اي هبدة جاية من الفتـيس 

16 – امشي بالعربية علي سرعة 80 مـثلا في حتة فاضية و سيب الدركسيون لو العـربية حدفت يمين او شمـال هيبقي عيب في 3 حاجات عيب طنابير او تـرصيص او العربية دي عاملة حادثة و في فردة شاسية فيها عيب يمين بقي او شمال 

شـوية كـلام هـتسمعة و أنت بتـشتري عـربية مسـتعملة لازم تـبقي فاهم معـناة  

  • عـربية فبريكة بـرة و جوة يـعني الدهان بتاعها بتاع المـصنع 
  • يـعني اية عـربية مـغيرة نـص ؟ يعـني بـتبقي عـربية عـملت حادثة و جابت نص من قدام يعني الكابوت كلة بالموتور بكل حاجة يعني وش العربية كلة بيضـيع فالناس بتجيب نص جديد من عربية متقطعة و بتلـحمة و دة بيكون مش حلو لاى عـربية مـستعملة لانها عمرها ما بترجع جديدة
  • نـص خـلفي اللى هو من اول الفوانيس اللى ورا لحد الكنـبة و بتـتعامل معاملة النـص اللي قدام 

مقالات ذات صلة

زر الذهاب إلى الأعلى
إغلاق